Í byrjun september málaði hópur starfsfólks Íslandsbanka kaffistofu Samhjálpar að innan, grindverk umhverfis lóðina og tvo stóra frystigáma. Framkvæmdin var hluti af verkefni innan Íslandsbanka sem nefnist Hjálparhönd. Bankinn býður starfsfólki sínu að verja einum vinnudegi á ári í sjálfboðastarf í þágu góðs málefnis. Starfsfólkið velur sér sjálft málefni en einnig geta góðgerðarfélög og þeir sem eru í forsvari fyrir önnur góð málefni haft samband við bankann og óskað aðstoðar. Algengt er að deildir eða samstarfshópar innan Íslandsbanka taki sig saman og vinni að stærri verkefnum, eins og þessu.