Launahækkunarþak SA rofið einu sinni enn

Samkvæmt upplýsingum forsætisráðherra munu laun æðstu ráðamanna hækka um 6 til 6,3 prósent þann 1. júlí næstkomandi án 66 þús.kr. þaks. Það verður þá í annað skiptið sem launahækkunarþak Samtaka atvinnulífsins (SA) er rofið, fyrra skiptið var þegar Félag ráðgjafarverkfræðinga, eitt aðildarfélaga SA, samdi við Verkfræðingafélagið um 6,75% launahækkun án þaks.

Það hefur allan tímann verið ljóst að 66 þúsund krónu þakinu var fyrst og fremst ætlað að bitna á félagsmönnum SSF. Sú staða að ráðherrar, þingmenn og æðstu ráðamenn skaffi sér nú launahækkanir án þaks sýnir fáránleikann í því að Samtök fjármálafyrirtækja (SFF) og SA skuli komast upp með að þvinga sínum lausnum upp á starfsfólk á fjármálamarkaði með fullum stuðningi stærstu fyrirtækjanna þar.

Það verður eitt af forgangsmálum SSF í næstu kjarasamningum að losna út úr neti krónutöluhækkana sem hefur bitnað illilega á u.þ.b. helmingi okkar félagsmanna allt frá árinu 2019.

Ari Skúlason, formaður SSF